Psalmus Laudate dominum omnes gentes
Frolich wollen wyr Alleluia singen,
aus hitziger gyr unsers hertzen springen,
Seyn gnad vertilget hat alle unser sunden,
in yhm haben wyr reuche schetze funden.

Alls was lebt auff erden sollen Got loben,
reichlich ist seyn gnad uber uns erhoben,
Gnad, leben, sterk und krafft haben wyr ererbet,
hell, todt, des teuffels macht ist durch uhn verterbet.

Gott sagt gnade zu alln, die yhm vertrawen,
trost, hilff, schickt er zu den, so auff yhn bawen,
Fest, stedt, trewlich helt, one list und triegen,
wye seyn wort vormelt, dan ehr kan nicht liegen.

Got sey lob gesagt und seym eynige sone,
heyligem geyst, Gott von art, mechtig in eym throne,
Von anbegyn er war, bleybt auch bis ans ende,
all welt sihet yhn klar. Herr, von uns nicht wende.

Ein Danckpsalm, Daß Gott die heyden zum gnaden reich, durch Christum berüffen wölle.

1. Haleluia,
singt vnd seit fro,
jr heyden all,
mit reichem schall!
Lobt Gott den Herrn
mit grossen ehrn,
in allem landt
sein Euangelion macht bekandt!

2. Drumb daß Er hat
auß lauter gnad
von Sünd vnd Todt
vnd hellscher not
Vns all erlöst,
ewig getröst
vnd helffen lon
durch Jesum Christum seinen Son.

3. Dann seine güt
vns stedts behüt
für teuffels list,
was schedlich ist,
All falsche lehr
treibt von vns feer,
leßt sein warheyt
vbr vns walten in Ewigkeyt.